的士加價｜10個港人搭的士至少5個不滿 曾智華：未見過人讚香港的士服務

服務奇差、車廂污糟、冚旗揀客、濫收車資、兜路拒載......你問十個香港人，有搭的士的，起碼五個非常不滿，另外四個頗不滿，最後一個，最多無乜意見。老友，我肥碌近幾年，真真未見過任何人稱讚香港的士服務，包括司機專業、車廂整潔、長短照載、有禮安全。

點解咁？同車資有直接關係？末必！

的士司機，十之七八為噴火阿伯，衣着隨便、情緒波動，成個火球咁，因呢個角色，形象低落之餘，收入更如雞肋。尤其租車揸的，永遠覺得車主㩒住搶，次次車費加價，車主必立即加車租，令到司機毫無得益，當然火都嚟。

好嘞，既然火都嚟，又點會有禮貌，點會清潔車廂（架車並非自己的），更潛意識將架車「虐待」，完全唔錫。如此心情，當然易撞車，而撞車賠錢，又屬大圍事，自己唔使上身。

咁搞法。駕駛態度點會好？於是，成日撞就由保險公司賠。保險公司做生意，當然加保費。好嘞，如今車主狂呻保費貴、整車貴，鬼咩，駕駛態度差，當然成日claim保險及修理啦，完全自己攞嚟！

你申請加價，話保費及修理費貴，一半係車主及司機共同導致的，仲好意思走去申請加價？你話嘞，乘客條氣點順？

唔順會點？一方面反對加價，一方面唔幫襯，改而走去坐網約車，於是，的士愈申請加價，行業愈快「謝」，牌價愈快跌，這個惡性循環必將出現！

假若政府、的士商會及的士公會不痛定思痛找出問題根源而解決，的士炸彈，隨時會爆！

中小學測考季即將來臨，TOPick精選名校的中、英、數、常練習題：立即免費下載

HKET App已全面升級，TOPick推出親子、健康、娛樂、港聞及休閒生活資訊及影片，立即下載︰https://onelink.to/f92q4m

追蹤TOPick Whatsapp頻道睇最新資訊︰http://tinyurl.com/3dtnw8f5